... तोपर्यंत नैना प्रकल्पाची वीट देखील ठेऊ देणार नाही- आमदार प्रशांत ठाकूर यांची ग्वाही

Panvel Times October 22, 2024 0

पनवेल (प्रतिनिधी) - जोपर्यंत सर्वांच्या शंकांचे निरासन होत नाही तो पर्यंत नैना प्रकल्पाची वीट देखील ठेऊ देणार नाही याची ग्वाही आमदार प्रशांत ठाकूर यांनी चिपळे येथे जनसंपर्क कार्यालयाचे उदघाटनावेळी दिली तसेच भाजपची भूमिका सर्व सामान्य जनतेमध्ये पोहचवून येणाऱ्या विधानसभा निवडणुकीत महायुतीचे सरकार पुन्हा निवडून देण्यासाठी सर्वांनी सज्ज व्हावे,असे आवाहनही त्यांनी कार्यकर्त्यांना केले. 

पनवेल विधानसभा मतदारसंघात आमदार प्रशांत ठाकूर यांच्या प्रचाराचा झंझावात सुरु आहे. या पार्श्ववभूमीवर तालुक्यातील चिपळे गावात भारतीय जनता पार्टीचे कार्यालय सुरु करण्यात आले आहे.याचे उदघाटन आमदार प्रशांत ठाकूर यांच्या हस्ते सोमवारी झाले.या कार्यक्रमाचे औचित्य साधून अनेकांनी आमदार प्रशांत ठाकूर यांच्या उपस्थितीत भाजपमध्ये जाहीर पक्ष प्रवेश केला.यावेळी आमदार प्रशांत ठाकूर यांनी सांगितले की, भारतीय जनता पार्टी जनसामान्यांमध्ये मिळून काम करणारी पार्टी आहे. आज सुरु झालेल्या या कार्यालयाच्या माध्यमातून लोकांना आपल्या समस्या सोडवण्यासाठी एक हक्काचे ठिकाण उपलब्ध झाले आहे. त्यामुळे मला खात्री आहे निवडणुकी नंतर देखील संपूर्ण परिसरातील लोकांना सेवा देणारे हे केंद्र बनणार आहे.या कार्यक्रमाचे औचित्य साधून उबाठा गटाचे भोकरपाडा गावातील शाखा प्रमुख गजानन फुलोरे,अनिकेत फुलोरे,अभिजित फुलोरे तसेच विहिघर मधील रहिवासी तथा वीरार येथील उभाटा गटाचे शाखाप्रमुख विश्वनाथ कांबळे यांनी भाजपमध्ये सामील होत पक्षाची ताकद अधिक मजबूत केली त्यांचे आमदार प्रशांत ठाकूर यांनी स्वागत करून त्यांचा निर्णय सार्थ ठरेल असे काम भाजपच्या माध्यमातून होईल असा विश्वास त्यांना दिला.