पनवेल महानगरपालिका मालमत्ता करावरील शास्तीमध्ये सवलत अभय योजना लागू .... अभय योजना दि.१८ जुलैपासून ते २० सप्टेंबर या कालावधीकरीता विविध टप्प्यामध्ये लागू

Panvel Times July 17, 2025 0

पनवेल : पनवेल महानगरपालिका कार्यक्षेत्रातील मालमत्ता कराबाबत गेल्या काही वर्षापासून शास्ती माफी संदर्भात मोठ्या प्रमाणात मागणी होत होती.त्यानुसार मालमत्ता करांवरील शास्तीमध्ये सवलत ‘अभय योजना’ महापालिकेने दि.18 जुलैपासून ते 20 सप्टेंबर या कालावधीकरीता विविध टप्प्यामध्ये लागू केली आहे.त्याचा सर्व संबधित नागरिकांनी लाभ घेऊन आपला मालमत्ता कर पुर्ण भरावा असे आवाहन पनवेल महानगरपालिका आयुक्त तथा प्रशासक मंगेश चितळे यांनी केले आहे. महानगरपालिकेत आयोजित पत्रकार परिषदेत ते बोलत होते.यावेळी परिवहन व्यवस्थापक कैलास गावडे,कर विभाग उपायुक्त स्वरूप खारगे उपस्थित होते.

 या संदर्भात संसद सदस्य, विधीमंडळ सदस्य, विविध लोकप्रतिनिधी,माजी नगरसेवक,विविध संस्थांचे प्रतिनिधी, विविध सोसायट्या,प्रसार माध्यम प्रतिनिधी आणि नागरिक यांनी शास्तीमध्ये सूट देण्याबाबत सातत्याने विनंती केली होती.तसेच शास्ती संदर्भात महानगरपालिका अधिनियमातील आयुक्तांस असलेल्या स्वेच्छा निर्णयानूसार शास्तीमध्ये सवलत असलेली ही अभय योजना लागू करण्यात आली आहे असे आयुक्त श्री.चितळे यांनी सांगितले.

शास्ती सवलत अभय योजना .....

थकीत मालमत्ता करांवरील शास्तीमध्ये सवलत देण्याबाबत अभय योजनेमध्ये चार महत्वाचे टप्पे आहेत. यामध्ये प्रामुख्याने 18 जुलै ते 15 ऑगस्ट 2025 या कालावधीत संपुर्ण मालमत्ताकर एकरकमी भरल्यास शास्तीमध्ये 90 टक्के सूट मिळणार आहे. तसेच 16 ऑगस्ट ते 31 ऑगस्ट या कालाधीत संपुर्ण  मालमत्ताकर एकरकमी भरल्यास शास्तीमध्ये 75 टक्के सूट मिळणार. तसेच  या पुढील काळात म्हणजे 1 सप्टेंबर 2025 ते 10 सप्टेंबर कालावधीत संपुर्ण मालमत्ताकर एकरकमी भरल्यास शास्तीमध्ये 50 टक्के सूट मिळेल. आणि 11 सप्टेंबर ते 20 सप्टेंबर या कालाधीत संपुर्ण  मालमत्ताकर एकरकमी भरल्यास असलेल्या शास्तीमध्ये 25 टक्के सूट मिळणार आहे. ही अभय योजना केवळ एकवेळची विशेष आणि अंतिम बाब म्हणून जाहीर करण्यात आली आहे. 

ऑनलाईन भरल्यास 2टक्के सलवत ...

पनवेल महानगरपालिकेच्या वेबसाईट, PMC Tax App अथवा पनवेल कनेक्ट ॲपद्वारे नागरिकांनी  मालमत्ता कर ऑनलाईन भरल्यास त्यांना 2 टक्के सवलत मिळेल तसेच  चालू वर्षाचा म्हणजे 2025-26 चा कर 31 जुलैपर्यंत भरल्यास त्यांना या करामध्ये 5 टक्के सूट मिळेल, तरी नागरिकांनी लवकरात लवकर कर भरणा करून याचा लाभ घ्यावा असे मालमत्ता कर उपायुक्त स्वरूप खारगे यांनी आवाहन केले 

ही अभय योजना 24x7 सुरू असून यासाठी महापालिकेने नवीन  मालमत्ता कर संकलन केंद्रे सुरू केली आहेत.

1. मालमत्ता कर संकलन केंद्र – प्राईड सोसायटी सेक्टर 7, खारघर

2. महा ई सेवा केंद्र – गंगा टॉवर, सेक्‍टर 21 कामोठे

3. महा ई सेवा केंद्र – ऍलियश बिल्डींग से17 प्लॉट नं84 मोठा खांदा नवीन पनवेल

4. सर्व  5 प्रभाग कार्यालये (नावडे उपविभागासहित)

5. मुख्यालय पनवेल

तरी आत्ता आणि एकदाच असलेल्या अभय योजनांचा लाभ संबधित नागरिकांनी घ्यावा असे आवाहन महापालिकेच्यावतीने करण्यात आले आहे.